يوميات (حلا بوديا)!!!...1

(تامر) ده اسمى..(حلا بوديا ) بقى لقبى..و اللى طلعه عليا العيال ولاد ال....اصحابى..بحس كده انهم مضطهدنى..تقولش يا خويا بيصرفوا عليا مثلا ولا بياكلونى ولا بيشربونى!!.بيقولوا لى ماتزعلش اصل اى شلة لازم يكون فيها واحد زيك( اهبل). ...مع  انى انا الفاكهة بتاعتهم والله....يعنى القعدة ماتبقاش حلوة كده ودمها خفيف الا لو العبد لله قاعد معاهم..موهبة ربانى بقى..اصلى خفيف  وعسل .. ده انا اخف دم فى منطقتى..ومحترم اخر حاجة...ده غير اخلاقى العالية ورجولتى..وكرم اخلاقى بقى وشهامتى..والذكاء بقى هوا اكتر حاجة بتميزنى...ده غير انى فى حالى وماشى جمب الحيط..وعمرى ما دايقت حد.. م الاخر كده تقدروا تقولوا شخص مثالى.... بس والله الواحد مش بيحب يتكلم عن نفسه كتير..ودايما بقول كلمة حكمة( خلى افعالك تتكلم بدالك)...يعنى مثلا من كام يوم كده قاعد مع العيال صحابى ع القهوة..وحلوين وقشطة والحياة حلوة على راى قناة فتافيت..اضرب لك بعينى كده الاقى واحد ماشى يترقص فى الشارع..مش عارف شكله كده ماعجبنيش..حسيت فيه حاجة غلط..وانا موتى وسمى الحال المايل بقى..الواد ده ليلته مش هتعدى..شكله هيندفن هنا فى القهوة....وقمت سايب العيال السيس صحابى ورحت مدى الواد ده بالقلم على قفاه  لغاية ما لسعته ورجعت قعدت تانى...الواد يا عينى فضل يلف حوالين نفسه ومكسوف يسال مين اللى ضربنى على قفايا؟؟ ماهى عيب فى حقه وهوا طول بعرض كده وياخد على قفاه..دى مراته لو شفته كانت هترقع بالصوت ومش بعيد كانت ادته بالقفا هيا كمان..ما اهى هيصة بقى...ويا عينى الواد من كتر مااهوا سرحان وبيفكر ما شافش العربية اللى كانت جاية فى ظهره..لسه يا عينى هيدور وشه العربية خبطته وقع على قفاه.الواد يا عينى قفاه اتبهدل خالص الليلادى...بس ارجع واقول  يستاهل..حد قاله يمشى يترقص..لا ويمشى قدام مين..قدام حلا بوديا..هوا كده اللى لعب فى عداد عمره.. ..المهم ركبت العربية مع  الواد (وليد) صحبى.. بس كان دمى خلاص اتعكر..وانا دمى لما يتعكر بقى انسى. ممكن ارتكب جريمة...ورغم انى مابحبش المشاكل لكن تلاقيها ياجدع هيا اللى جاية لغاية عندى..اسئصاد بقى...المهم اركب لك مع الواد(وليد) ..مع انى ما كنتش عاوز اركب معاه..اصله حمار فى سواقته..بس اللى حصل بقى...وبعد كده الاقيه بيسوق و هوا قالع التشيرت بتاعه..اتهبل ده كمان...يعنى لو حد شافنا يقول علينا ايه.دوقتى؟؟.هوا فاكر دى روشنة مثلا..دى قله ادب ومسخرة..اللهم اخزيك يا شيطان..شكلى كده هفوق عليه....لازم اربيه الواد ده....قمت واخد التشيرت بتاعه ولبستهوله وهوا بيسوق..الواد يا عينى كان هيعمل حادثة..اهبل اهبل. (شيل التى شيرت يا حمار)هوا اللى بيقول..(مش شايف الطريق يا بنى)..اصبر انا بلبسهولك اهوا..بس اصله ضيق اوى..مش تجيبه واسع شويه..(ياللا يا زفت هنعمل حادثة..ارحمنى يا غبى...)....غبى !!دى اخرتها ??انت بتشتمنى وانت اللى غلطان يا وليد الله يخرب بيتك!!  طب تقولى حمار ماشى  عديتها لك بمزاجى..لكن غبى دى..لاء.الكلمة دى بتعصبنى....ومع ذلك ما تزعلش يا سيدى زى ما لبستك التى شيرت..هقلعهولك تانى..عشان تبقة تشتم براحتك يا عم...(الحقوووووووووووووووونى..مش شايف حاجة..فيه واحد اهبل جمبى..)...صحبى هوا اللى بيصرخ. كده ...هههههههه...اصله غبى غبى.. ومابيعرفش يسوق كمان.!!

يوميات (حلا بوديا)!!!...2

طلعت شرم مع العيال(وليد) و(عمرو)..هما اللى اقنعونى اصل انا ماليش اوى فى الرحلات والكلام الفاضى ده..بس اهوا تغيير مناظر..ولو انى هتصبح بوش اصحابى وهتمسى بخلقتهم البهية..يعنى واحنا فى القاهرة كنت اقصى حاجة بقعدها معاهم هما الساعتين بتوع القهوة.مش دلوقتى طول اليوم فى خلقتى...ياللا اهم يومين وهيعدوا وخلاص..حاجة تقرف..بقى دى مناظر حد يتفسح معاها دى!!..ياللا عشان ننزل البحر اتاخرنا(عمرو صحبى علطول مستعجل كده)..انا جاهز خلاص..(انا اللى بقول)
..جاهز ايه ؟هوا انت هتنزل البحر؟.؟ ناوى تفضحنا؟( وليد بيسالنى)
انا برضه اللى هفضحكوا..ماتقلقش مش هتنيل انزل..(انا ايه اللى جابنى)..ايوة انت هتقعد تصورنا صور حلوة كده واحنا بنعوم(الواد فاكر نفسه سمكة..ده بيعوم عوم كلاب اصلا)...حاضر هصوركوا صور تهبل..سيبوا الحكاية دى عليا(انا بطمنه)
المهم رحنا البحر..الصراحة شكل البحر يهبل..اه لو كنت بعرف اعوم..كنت وريتهم الشغل بدل ما هما دبسونى فى التصوير ده وانا اصلا مابطيقش امسك كاميرا..ايه القمر اللى معدى جمبى ده؟؟ اهى دى المناظر اللى تتصور مش الواد عمرو..
-ياللا يا بنى..صورنى بالعوامات يا زفت(لسانه طويل عمرو ده)
-خلاص ..صورتك..
-صورنى بقى وانا بغطس
-ده انا اللى شكلى هغطس
-صورنى بقى وانا بعوم على ظهرى..ها صورتنى..ركز يا بنى
-صورتك ..زى القمر
-قمر ايه يا اهبل انت..ضغطت ع الزرار الاخضر
-وانت مالك..صورتك وخلاص ماتقرفنيش بقى
-طب فرجنى كده ع الصور
-اتفرج ده انت هتنبسط منهم اوى
-ورينى يا خويا..ايه ده؟؟فين انا؟؟فينى؟؟انا فين؟؟
-انت فى شرم يا عمرو نسيت ولا ايه؟؟
-قصدى انا فين فى الصور؟؟انت سايبنى ورايح تصور خواجاية معفنه..سايبنى قاعد اغطس واعوم والبس العوامات
-طيب بذمتك دى خلقة حد يصورها؟؟ ده انت اقرع ..اصور القرعة دى واسيب الصاروخ ..وبعدين ماتعمليش فيها البحار مندى..والايام جاية كتيررر..ده انا حهريك صور يا عم..ما قولتليش بقى.. ايه رايك فى القمر دى بذمتك؟؟
-ولا حلوة ولا حاجة دى حتى شبهك!!
.(الواد عمرو ده يخنق..بيخلى الواحد يتكلم كتير..وانا اصلى مابحبش كده..انا خلقى فى مناخيرى..هيا رحلة نكد من اولها انا عارف)
..رحنا اودتنا فى الفندق..والعيال كلهم دخلوا ناموا..مرهقين بقى من كتر العوم..وهما ولا بيعرفوا يعوموا اصلا....فالحين بس يتريقوا عليا..طب على فكرة ده الواد وليد كان هيغرق النهاردة اربع مرات..ده كمان كان ع الشط اومال لو كان دخل فى الغميق شوية كان عمل ايه..وبيعايبوا عليا بس..الواد كان هيغرق فى شرم.!!شكله كان هيبقى بيئة اوى ههههه ..
-صباح الخير يا بوديا
-قصدك مساء الخير..ماانتوا جايين هنا تعوموا وتنبسطوا وانا جاى احرس لكوا الحاجة  واصوركوا كمان..لا وكمان تعايبوا على تصويرى
-نعايب ايه؟هوا انت صورتنا اصلا...ايه ده؟عنب ده؟؟
-انت شايف ايه؟ اه عنب نزلت اشتريته ماانا قاعد زهقان
-اول مرة تعمل حاجة عدلة.اصل انا بعشق العنب
-بالهنا والشفا يا ليدو
-بس يا شيخ العنب فى شرم طعمه مختلف عن عنب القاهرة
-لاء انت بس متهيالك
-مش عارف..طعمه غريب
-اهههه..نسيت اقولك..اصلى بعد ما غسلته رشيت عليه بيروسول..
-نعم يا خويا رشيت ايه؟
-بيروسووووووووووووول..انت كمان ما بتسمعش يا وليد؟؟
-رشيته ليه يا زفت؟؟
-كنت عايز اصطاد الدبان
-دبان ايه يا حمار؟هوا احنا فى بلطيم ؟ده احنا فى شرم يا غبى
-انت لازم تقفل كل جمله بشتيمة..هوا انا عشان مؤدب يعنى
-واصطدت يا خويا
-تصدق مالقيتش ولا دبانة..شرم نظيفة برضه ..ايه مالك يا وليد؟؟..وشك ماله احمر كده..مالك يا بنى..
-مفيش ماتشغلش بالك..انا بس هخليك تطفح العنب اللى فى الطبق ده كله
-ربنا يخليك ..ماليش نفس والله
-مش بمزاجك..افتح بقك..افتحححححححححححححححححح
الواد الاهبل اكلنى العنب كله بالعافية..وفضلت اقوله مابحبش العنب مابحبش العنب..بس هوا حمار ما بيفهمش..طبعا عايزين تعرفوا حصلى ايه بعد ما كلته..اتطمنوا صحتى لسه كويسة..اصل يظهر ان حتى البيروسول بقوا بيغشوا فيه..الله يخرب بيوتهم..بالنسبة بقى للواد وليد..دخل المستشفى يا عينى..اصله فرفور كده وما بيستحملش..مش عارف الواد ده حظه دايما وحش معايا كده ليه..اصله غبى غبى!!

يوميات (حلا بوديا)!!!...3

رجعنا من شرم الحمد لله..كانوا يومين عسل..لولاش بس الواد وليد نكد علينا فى الاخر..هوا اصله واد نكدى من يومه..وانا قلت له يا وليد انت مش بتاع رحلات..الرحلات دى عايزة الناس العسل اللى زيى..ناس لذيذة وتقول نكت طول النهار..مش هوا عيل كده وكل حاجة يتقمص لى..نكدى نكدى يعنى..ربنا يهديه يارب..اهوا طالع يعمل عمرة الاسبوع الجاى..يارب يرجع معدول من هناك..ولو انى شايل منه..اصلى كان نفسى اطلع معاه واهوا نبقى صحبه..لكن هوا مارداش..قالى لو طلعت معايا يا بوديا هتضيع لى الثواب..لانى اكيد هتعصب عليك..هوا اصله مش متربى وعارف نفسه بقى..
-ازيك يا ليدو
-ازيك يا خويا
-ما تتكلم عدل معايا
-انت ليك عين تتكلم معايا
-يا جماعة صلوا ع النبى(عمرو صاحبنا)
-اللهم صلى على سيدنا محمد..بذمتك يا عمرو..ده شكل واحد رايح يعمل عمرة..ده اسود من جوة يا عم..
-خلاص يابوديا..حصل خير
-ايوة كده ربنا يهديك يا وليد
-وربنا ياخدك يا بوديا
-كده ده انا حتى جايب لك هدية
-مش عايز منك حاجة..اى حاجة منك بتبقى قلق..
-ده كتاب مش مفرقعات انا عارف انك بتحب تقرا واهوا يسليك فى الطيارة بس اوعى يطير منك ههههههههه
-اهى دى هدية حلوة بجد..ما انت ساعات بتفهم اهوا..اومال ايه اللى بيحصلك ساعات
-والله انت ظالمنى..والايام هتثبت لك
-كتاب ايه ده بقى
-لاء خليه مفاجاة..بس عشان افرحك هوا كتاب حلو اوى وانت كان نفسك تشتريه من زمان
-اه اكيد كتاب عن الابراج
-ايوة حاجة زى كده..افتحه ف الطيارة
-بس مش حرام اقرا عن الابراج وانا رايح عمرة
-يا سيدى ما تصدعنيش بقى انا بتخنق بسرعة
-ماشى يا بوديا بس حلوة اللفة اللى انت لفه بيها دى..ايه الرومانسية دى يا عم.!
-اى خدمة..انا هتكل على الله بقى..ومعلش مش هقدر اجيلك بكرة المطار اصلى قلبى حساس ومش بستحمل المواقف اللى زى دى..سلام يا جماعة....
............-------------------------------------------------------
تانى يوم
باب الشقة عند حلا بوديا بيخبط جامد اوى.......
-يا ساتر يارب مين اللى بيخبط بغباء كده...ايوة حاضر..اهلااااااا ازيك يا عمرو..ايه اللى جابك دلوقتى؟؟انت وصلت وليد خلاص المطار.؟
-لاء ماوصلتوش لسه يا زفت
-يوووووه..رجعنا لطوله اللسان تانى..فيه ايه ع الصبح؟؟
-الكتاب اللى سيادتك جبته لوليد اسمه ايه؟؟
-هوا ايه
-الكتاب يا نيلة
-هوا انا عشان متربى..تفضلوا تهزئوا فيا بالشكل ده
-انطق يا حيوان
-كتب حلو اوى يسليه فى الطيارة
-اسمه ايه؟؟
-السحر الاسود
-وتجيب له كتاب عن السحر الاسود وهوا مسافر السعودية يا غبى..انتى هتموتنى ناقص عمر يا بوديا..اشوف فيك يوم يا شيخ...انت ايه يا بنى كوكتيل رخامة..كوكتيل غباء..خليط تخلف..الواد بقى كل مايروح حتة يفتشوه وامن الدولة راحوا قبضوا على اهله وفتشوا بيته.حرام عليك الواد هيموت وانت السبب..
- انا غلطان يا سيدى انى عايزه يتثقف ويتسلى..انا برضه اللى طلعت غلطان فى الاخر....
..طبعا انتوا شايفين بعينكوا وشاهدين ان انا ما رديتش عليه الشتيمة..بقولكوا انا متربى وابن ناس مش زى العيال دى..اظن اتاكدتوا انهم على طول ظالمنى ومحدش فيهم قادر يفهمنى..بالنسبة لوليد صحبى اتحجز فى المطار واتمنع من السفر ..تقريبا شكوا فيه عشان الكتاب اللى كان معاه..مااهوا واد غشيم تلاقيه ماشى حاطط الكتاب على صدره وفرحان بيه يقول للى ما يعرفش اعرف..واد غبى بقى..بس لسه صحبى على فكرة..فاضل له موقفين كمان ويقطع علاقته بيا..

يوميات حلا بوديا...4

-الووووووو
-ايوة..استاذ تامر والشهير بحلا بوديا
-يااااه هوا انا اتشهرت للدرجة دى ..ده ولا عمر الشريف فى زمانه..ايوة اى خدمة يا انسة
-الف مبروك يا فندم
-الله يبارك فيكى يا سكر..بس على ايه؟؟
-عملنا سحب عشوائى على ارقام التليفونات وحضرتك فزت معانا ..
-ربنا يخليكى..اصل بصى انا رقم تليفونى سهل كده وحلو زيك يا حلو
-ربنا يخليك يا فندم..بس فيه شرط عشان تفوز بالجايزة
-انتى هتشرطى من اولها
-حضرتك تروح تقف فى ميدان التحرير وتقول انا مش قصير قزعة انا طويل واهبل..
-نعم يا ختى
-عشان تفوز بالجايزة يا فندم
-جايزة ايه دة
-حضرتك فزت معانا بباكو لبان
-شكلى كده هفوق عليكى..انتى عايزة ايه ع الصبح ومين اللى مسلطك يا بت
-تعيش وتاخد غيرها يا غبى
-ايه ده انت عمرو؟؟
-انت هتصاحبنى..انا اصلا ما بكلمكش
-والله صدقت انك ست بجد.هوا صحيح ست صوتها يقطع الخميرة م البيت بس صدقت..اخس عليا..ازاى تدخل عليا حاجة زى دى..ياللا ما انا اصلى طيب وغلبان مش زيكوا
-انت طيب انت....ماشى..سلام يا طيب
. الواد عمرو ده هايف بطريقة..بيموت فى المقالب والتفاهة..عيل وهيفضل طول عمره عيل...نفسى يكبر ويعقل كده زيى..ربنا يكملنى بعقلى يارب..
-----------------------------------------------------------------
مش عارف الواحد زهقان كده ليه..حاسس بفراغ عاطفى..وكمان العيال صحابى مقاطعنى..مش عارف ليه..بكرة يندموا..ولا احسن ادينى مرتاح منهم ومن غبائهم........
ترن ترن ترن....اخيرا موبايلى رن
-الوووو..مين؟؟
-انا واحدة معجبة بيك اوى
-(الله اكبر..شكلها هتفرج)..اهلا بيكى
-اصلى سمعت عنك كتيررر
-سمعتى عنى من مين  ياترى؟؟
-من واحد صحبك اسمه وليد..بيشكر فيك اوى
-وليد ده حبيبى..ده انتيمى..بعتبره اخويا والله
-انا شفت صورتك فى موبايله واعجبت بيك اوى
-(شكلك بتفهمى)..من ذوقك والله..مع ان الصورة مش زى الحقيقة برضه خدى بالك ده انا ع الطبيعة احلى واعجبك اوى
-هههههههههههههه
-ضحتك تجنن يا..انت اسمك ايه بقى؟؟
-اسمى فوزية
-نعم
-اسم قديم شوية بس
-لا ولا يهمك هسميكى انا اسم تانى
-ممكن تسمينى سمية ..اصل كل اللى يعرفونى بيسمونى سمية عشان فيه شبه كبير بينى وبين سمية الخشاب عارفها
- عارفها..ده انا بعشقها.. انتى قمر على كده..
-على فكرة انا احلى منها
-يا سيدى ع الجمال..(دى احلوت اوى؟)..وانا برضه فيه شبه كبير بينى وبين عمرو دياب تعرفيه يا قمر؟؟
-ههههههههههههههه.
-مش بهزر ده نسخة منى
-طب انا عايزة اشوفك بقى
-انتى فين وانا اجيلك يا قطة
-هستناك كمان ساعة فى كازينو النيل.....
- هطيررررررر واجيلك يا سوسو
-----------------------------------------------------------------
بعد ساعة فى كازينو النيل..
يوووووووووووووه انا اكره ان حد يلطعنى بقى ..لان انا بحترم مواعيدى..وما احبش النظام ده...فكرتنى بالواد وليد..على طول كان يلطعنى كده..مااهى مجايبه بقى..ياللا كله يهون عشان سمية..دى شبيهة سمية الخشاب مش اى حد...ياللا يا مسهل..
-حضرتك استاذ تامر
-ايوة عايزة ايه يا ست الحاجة
-انا سمية
-نعم
-ايه احلى من اللى انت توقعته
-احلى اوووووووووووووووى..(ده انتى شبه الخشاب  نفسه مش سمية)
-ربنا يخليك
-(ربنا ياخدك يا وليد..ده مقلب برضه..تبعت لى واحدة شبه مارى منيب..لما اشوفك بس)....طب يا قطة..ايه رايك نطلع على اسكندرية دلوقتى؟؟
-دلوقتى؟.؟ اتاخرنا..
-اتاخرنا ايه ..بصى هروح اشترى عربية واجيلك على طول
-نعم
-اوعى تمشى استنينى هنا..مش هتاخر...هشترى عربية واطلع رخص  واجى على طول..ادعيلى بس انجح واطلع رخصة.
-بس كده هتتاخر اوى..
-اسبوع بس يا قطة..هوا كتير عليا اسبوع برضه..اصل انا حبيتك اوى..مش عارف ليه فكرتينى بالمرحوم ابويا..الله يرحمه...هعدى عليه بالمرة اقرا له الفاتحة واجيلك على طوووووووول..سلاااااااااااااام
-انتى بتجرى ليه كده طيب..حاسب احسن توقع..ماتتاخرش عليا..
يا شيخة غووورى.عاجبكم كده..اهوا ده وليد اللى كنت فاكره اهبل..بيستغل عواطفى اكمنى واد حساس وعاطفى ويضحك عليا فى الاخر بواحدة شكلها عجب....ماشى يا وليد...بس ارجع واقول انا اللى غلطان..المفروض اول ماتقولى انها مجايب وليد كنت خلعت على طول بس انا اللى غبى غبى...بس هموت واعرف مين الحمار اللى قالها انها شبه سمية الخشاب..اه لو اعرفه..

يوميات حلا بوديا...5

(ع القهوة.)...مش عارف الواحد كده اتخنق من مشوار القهوة ده..نفسى بقى اتجوز واستقر ومااعبرش العيال التحف دول..بس اعمل ايه نصيبى كده ..ربنا واعدنى بشوية عيال متخلفة..مايجيش وراهم غير البلاوى وبس..
حلا بوديا: بقى ده مقلب برضه تعمله فيا يا ليدو..ده انا حتى بعزك..بقى دى شبه سمية الخشاب دى؟؟
وليد: والله حلال فيك..وبعدين هوا انت يعنى اللى شبه عمرو دياب؟؟ده انت الشبح بتاعه.!.بس على فكرة هيا اعجبت بيك بجد
حلا بوديا: وهيا الاشكال دى ما بتعجبش بحد..متهيالى لو شافت كلب معدى هتعجب بيه!!
عمرو: يا جدعان حرام عليكوا بقى اتقوا الله
حلا بوديا: اصلك ما شوفتهاش لو كنت شفتها كان هيغمى عليك..والله انا طلعت جدع انى عرفت امسك نفسى واهرب بجلدى
وليد: بس البت نفسيتها تعبت ..حرام عليك يا مفترى يا دنجوان يا سارق قلوب العذارى
حلا بوديا: انا ما سرقتش حد يا خويا..وبعدين قفل بقى الموضوع ده عشان بيعصبنى..بحس انى مغفل..ودى اول مرة تحصلى واخر مرة ان شاءالله..انا هقوم امشى بقى عشان اتخنقت منكوا
عمرو: ايه مش هتتفرج ع الماتش معانا
حلا بوديا: من امتى يعنى؟؟مش كنتوا بتتشائموا منى
عمرو: اعمل ايه اصلك صعبت علينا
حلا بوديا: ما يصعبش عليك غالى يا خويا انا هروح واشبعوا انتوا بالماتش
وليد: ادعى للا هلى بقى  يا فقر
حلا بوديا: انا اللى فقر برضه؟؟
عمرو: انت نسيت؟؟ ده يوم مااتولدت حصل زلزال 
حلابوديا: طبيعى لما واد عسل زيي يتولد لازم يحصل زلزال..هوا انا انسان عادى.!!
عمرو: ويوم سبوعك يحصل زلزال تانى..
حلا بوديا: طبيعى لازم اى زلزال يكون له توابع يعنى
وليد: واحنا ذنبنا ايه بقى نستحمل توابعك المنيلة
حلابوديا: انتوا لسه هتقلبوا عليا المواجع..انا ماشى يا خويا
-----------------------------------------------------------------
بعد ساعة ونص...والماتش خلص والاهلى اتغلب...
ترن ترن ترن(موبايل وليد بيرن)
وليد: الوو ..ايوة يا بوديا ..خير..مش فايق لك
حلا بوديا: مبروك للاهلى يا حبيبى انتوا تستاهلوا كل خير والله
وليد: انت هتتريق كمان..مش طالباك..وبعدين فيها ايه لما نتهزم مرة من نفسنا يعنى
حلا بوديا: يا راجل هوا انتوا اتهزمتوا؟
وليد: اللهم طولك يا روح..انت ما شفتش الماتش
حلا بوديا: شفته كله والمصحف..بس انتوا فزتوا عندى..حتى بالامارة الحضرى مادخلش فيه ولا جون
وليد: .انت هتجننى.. هوا الحضرى دلوقتى بيلعب مع الاهلى ..اقفل اقفل  يا اهبل
حلا بوديا: طب والله فزتوا..اههههههه اصلى شفت الماتش فى قناة الاهلى..يكونش ماتش قديم..ده انتوا فزتوا 3 صفر...الوووو..ايوة يا وليد..انت قفلت..معلش انا عاذرك برضه..مع ان الزمالك على طول يتهزم وعمرى ماقفلت السكة فى وشك..ماشى متشكرين ياعم..
-----------------------------------------------------------------
بعد ساعة...
ترن ترن ترن(موبايل عمرو)
حلا بوديا: ايوة يا ابنى..
عمرو: عايز ايه يا فقر.هوا انت فاضى؟؟
حلا بوديا: الله يسامحك يا عمورة..انا مقدر اللى انتوا فيه
عمرو: ما تخلص يا زفت عايز ايه؟؟
حلا بوديا: فيه خبر وحش شوية
عمرو: خيررررررر..انطق..امى حصلها حاجة؟؟
حلا بوديا: وانا مالى بامك يا زفت
عمرو: اومال فيه ايه انطق
حلابوديا:انا اسف مش قادر اتكلم
عمرو: انطق يا متخلف ..اعصابى باظت..اوعى يكون حصل حاجة لمراتى ولا للعيال
حلا بوديا: وانا هعرف مراتك منين بس يا غبى انت؟؟ده انا حتى ماحضرتش فرحك..نسيت؟؟مش انا كنت يومها مسافر ومعرفتش احضر..بس والله زعلت اوى  اصل كان نفسى احضر..تتعوض ان شاءالله فى جوازتك التانية
عمرو: جوازتى التانية؟ هوا حصل حاجة لمراتى
حلا بوديا:  يادى النيلة.....هوا انا اصلا كنت حضرت فرحك ولا عارف شكل مراتك حتى..طب تصدق بايه انا لغاية دلوقتى مش عارف اسم مراتك ايه؟؟
عمرو: حد من العيال تعبان؟؟
حلابوديا: هوا انت خلفت؟؟الف مبروك يا حبيبى..معاك ايه بقى؟؟
عمرو: طب اقفل يا بوديا اقفل..مش عايز اعرف..انا حاسس انى هتشل  على ايدك
حلا بوديا: عايز اقولك ان القطة اللى انت اشترتها لبنتك تعيش انت..طبعا على وش ماتش الاهلى ...عشان تقول لوليد مين اللى وشه وحش!! وعشان حضرتك تعرف مين اللى فقر ؟انا ولا الاهلى يا خويا؟
عمرو: ده انت عيل بشكل.!! يا راجل وقعت قلبى.. طب اعمل ايه فيك بس؟؟ لو انت مراتى كنت طلقتك و لو ابنى كنت اتبريت منك ولو صحبى كنت قاطعتك لكن انت عملى الرضى اروح منك فين بس..ربنا يورينى فيك يوم يا فقر..

يوميات حلا بوديا...6

قمت م النوم النهاردة متاخر..شكلى كده هتاخر ع الشغل..لما احلق دقنى بسرعة..يووووووه مفيش كمان امواس حلاقة...هوا يوم باين من اوله..استغفر الله العظيم..اروح بدقنى كده وخلاص حتى عشان كلهم يخافوا منى ويعملوا لى الف حساب...ياااااااااااه الاسانسير كمان عطلان..فيه ايه يا جدعان؟؟..المهم يعنى فى الاخر رحت الشغل..وبعد مارحت مالقيتش حد خالص هناك...سبحان الله كلهم باين صحوا م النوم متاخر زيى..هوا فيه ايه؟؟محدش ناوى يجى؟؟اه صحيح ده النهاردة 23 يوليو ...اجازة يا حمار(بقول لنفسى)..بس ماشغلتنا مالهاش دعوة بالاجازات(يكونش المطعم غير مكانه ونسوا يقولولى)..اه افتكرت ده النهاردة المطعم هيفتح متاخر وكمان الشفت بتاعى لسه بالليل..اما انا اهبل بشكل ..كان زمانى لسه نايم ..ياللا اروح اكمل نوم احسن لى..بس انام ازاى هوا انا هيجيلى نوم تانى..ده انا بنام اصلا بالعافية..طب هوا كان ايه اللى صحانى اصلا..مش عارف الواحد مش طايق نفسه ليه كده؟؟ اكيد الواد عمرو ووليد بيجيبوا فى سيرتى وبيقروا عليا طول النهار..عيال قرارة...
واحدمعدى: صباح الخير يا استاذ تامر...
اتفضلوا عندكوا اهوا واحد لا اعرفه ولا يعرفنى وبيقولى صباح الخير..ايه يا بنى هوا انت من بقية اهلى..انا عمرى كلمتك يا بارد..بلاوى بتتحدف ع الواحد..هوا انا ناقص..
واحد تانى معدى: ازيك يا استاذ تامر..مش هنفرح بيك بقى؟؟
..لا حول ولا قوة الا بالله..العالم كلها اتجننت خلاص..انت مالك اتجوز ولا مااتجوزش هوا انت هتصاحبنى يا خويا....الواحد طيب برضه وبيخلى الناس كلها تتعود عليه...ربنا يستر بقى ومااروحش الاقى البيت ولع...مااهى الناس عينها وحشة..مش عارف ياخويا الناس مركزة معايا ليه كده..ده انا حتى فى حالى وماشى جمب الحيط..
------------------------------------------------------------
بالليل  ع القهوة....
حلا بوديا: ازيكوا يا عيال..كل عيد ثورة وانتوا طيبين
عمرو:سمعت انك رحت الشغل النهاردة مرتين؟؟..
حلا بوديا: انا اصلى مابصدق اليومين دول عشان اخرج م البيت
وليد: ليه ماله البيت؟؟ احكى لنا احكى لنا
حلا بوديا:مش عارف ياجدع..بقى لى كام يوم كده بتحصلى حاجات غريبة وباليل بالذات..اجى اقف فى البلكونة احس بخيال كده جمبى..والاقى اماكن الكراسى بتتغير..واللمبة بتاعة اودتى كل يومين تتحرق
وليد: يمكن من عمايلك السودة يا بوديا؟
عمرو: ولا يمكن من كتر مابندعى عليك
حلا بوديا:مش عارف انا من يوم مازرعت شجرة تحت البيت وانا بحس بكده..يكونش الجيران حسدونى؟؟قالوا بقى ده واد محترم وغنى وبيزرع شجر وافتكروا انها هتطرح موز ولا حاجة
وليد: ماانت قرد..لازم تزرع موز..
عمرو: طب ما تشيلها يا بنى بلا شجر بلا بتاع
حلا بوديا: جبت التايهة يا خويا..عم فتحى الجناينى مسافر البلد عشان مراته كانت بتولد ومش جاى قبل شهر
عامل القهوة: عايزين حاجة تانية يا بهوات؟؟
عمرو:بقولك ياعجوة..ماتعرفش حد يجى يشيل لنا شجرة مدايقانا
عامل القهوة:وماله يابيه ..انا اجى اشيلها لك..انا خبرة فيهم..بس بقول ايه..ماتسيبوها..حد يطول يبقى جمبه شجرة
حلا بوديا: اصلها جايبة لى القر والحسد وبحس بحاجات غريبة من يوم ما زرعتها
عامل القهوة: بتحس بحاجات غريبة؟؟هيا الشجرة اسمها ايه يا بيه؟؟
حلا بوديا: اسمها شجرة العشر
عامل القهوة: يا لهوى يا خرابى..شجرة العشر
عمرو: ايه يا بنى مالك؟
عامل القهوة: دى اسمها الحقيقى شجرة الجن..والجن بيسكنها بالليل واللى بيقعد تحتها بيتقتل
حلا بوديا: يا دى النيلة..الله يخرب بيتك يا فتحى يا جناينى ..ده مقلب برضه تعمله فيا..باعت لى جن يرعبنى هوا انا ناقص ده انا بترعب من خيالى...بقولك يا عجوة ما تيجى تروح معايا ونخلعها
عامل القهوة:معلش يا بيه..اخاف والله احسن الجن يستئصدنى وانا غلبان ده انا وحيد ابويا وامى..دول مجابوش غيرى..
حلابوديا: انتى هتحكى لى قصة حياتك؟؟ ابوس ايدك يا عجوة تعالى معايا ..تعالى يا جبان
وليد:ههههههههههه حتى الجناينى عامل فيك مقلب؟.ايه يا بوديا الناس كلها طهقانة منك
حلا بوديا: ماشى يا عم فتحى....حتى انت...لما اشوفك بس..طب معلش يا جدعان.ينفع ابات عند حد فيكوا النهاردة...مش هعمل حركات غبية ماتخافوش (وربنا يصبرنى عليكوا وعلى غبائكوا بقى)

يوميات حلا بوديا...7

اضطريت بقى اروح اقعد مع وليد صاحبى الكام يوم دول لغاية ما الجناينى الزفت يجى ونخلص من موضوع الشجرة دى..الصراحة كنت عايز اقعد مع عمرو..اصل الكيميا بتاعتى مش بتمشى مع كيميا وليد وخايف يحصل فى الاخر ماس كهربائى ولا حاجة ربنا يستر..قلت له يا عمرو اجى اقعد عندك؟؟..قالى ماينفعش عشان مراتى تاخد راحتها وكمان عشان عيالى ما يجيلهمش تخلف عقلى..الواد عمرو ده طلع مش متربى..كل يوم بتاكد من كده..
-عايز تتغدى ايه؟؟
-لا بالهنا والشفا انت..انا سبقتك
-يابنى انا كده كده هبعت اجيب شاورمة..قولى اجيب لك كام سندوتش؟؟
-ياسيدى بقولك اكلت ..شبعان الحمد لله
-خلصنى بقى اجيب لك ايه..لازم تجيب اى حاجة
-خلاص مدام انت مصمم..هات لى خمس سندوتشات
-نعم..انت مش بتقول انك واكل..اومال لو مش واكل كنت عملت ايه؟
-فيه ايه يا وليد؟..ماانت عارف انى بحب الشاورمة وبعدين ايه ياعم انت هتبص لى فى اللقمة؟..خلاص ياسيدى هحاسب لنفسى
-انت مجنون يا بنى؟؟ انت فى بيتى
-يعنى هوا بيت الرعب..هحاسب لنفسى خلاص
-خلى عندك دم طيب وحاسب لى انا كمان بالمرة
-------------------------------------------------------------
بعد ساعتين....
الراجل بتاع الدليفرى اتاخر كده ليه؟؟تلاقيه تاه ولا عمل حادثة شكله غبى زى وليد..لما ابص عليه م البلكونة..اهوا انا بقى لى 3 سنين شغال دليفرى عمرى مااتاخرت على زبون كده..بس هوا فيه حد زيى.انا واد ملتزم ومحترم من يومى..ياسلام..والله انا ابن حلال انى طلعت البلكونة دلوقتى..ايه القمر ده..هوا القمر بيطلع الصبح؟..ده ايس كريم ده ولا ايه..ياسلام ع الطعامة..ده انا امى داعية لى..اوعى تكونى مخطوبة..ده انا ازعل اوى..انتى مش بتردى ليه؟ظاوعى تكونى خرسة..ماانا عارف حظى..طب بقولك ايه ماتجيبى شوية شيبسى من اللى فى ايدك ده..
-انت يا زفت
-ايه يا بنى..معلش اصل صحبى مريض نفسيا وبيحب يشتم.عن اذنك
-انت بتعمل ايه يا بوديا؟
-مفيش بعاكس واحدة جارتك وكانت لسه هتحدف لى شيبسى
-انت بتعاكس ولا بتشحت..بقولك ايه تقعد عندى هنا بادبك..مش عايز فضايح..انا عمرما حد اشتكى منى..سامع..ده انااول مرة اعرف انى عندى جيران بنات!!
-اصلك واد قفل وعبيط..فين بقى السندوتشاااااااااااااااااااااات؟؟
-اهوا الباب بيرن ..روح افتح له وحاسبه بالمرة..
-اه بس لو مكنتش فى بيتك...........
مش عارف انا هبات هنا مع وليد ازاى؟؟ الواد ده تقيل على قلبى وبيستفزنى..انا اتصاحبت عليه ازاى ده؟؟انا كنت اتهبلت ولا عقلى خف؟..واد قليل الذوق سابنى احاسب ع السندوتشات..يعنى هوا طافح لوحده تلات سندوتشات وسلطة وبطاطس وكاتشب كمان..بالهنا والشفا ما قلناش حاجة بس برضه دى طفاسة مع انى والله مسامح بس متغاظ منه..واللى غايظنى اكتر انه مكلم عمرو يقوله انه عزمنى على شاورمة..طب ازاى ده انا اللى دافع..يعنى هوا يلغ وكمان يتفشخربفلوسى!!  و كمان بيعزم على عمرو يجى يتغدى معانا بكرة..وهوا خسران حاجة ؟.ماانا اللى هتدبس فى الحساب..وقال كمان يقولى تحب اعزمك بكرة على ايه يا بوديا؟؟ مااهوا مش دافع حاجة من جيبه..هوا تعبان فى حاجة.!!.النهاردة  عازمك على شاورمة وبكرة يقولى عازمك على كباب وكفته وابص الاقى نفسى انا اللى بحاسب.. مااهوا استكراد بقى..وقال عايزنى كمان اجيب له تشيكن من المطعم اللى بشتغل فيه..عشان يبقى رفدى على ايده..اصل ساعتها هيقولوا مشغل المطعم لحسابه بقى...ياريتنى كنت روحت قعدت فى بيتنا..بس مكنتش هاعرف اقعد ولا انام هناك..وهوا يعنى هعرف انام هنا من شخيره..لا ويقولى انت اللى بتشخر مش انا..طب وربنا لاسجل له شخيره واعمله نغمة كمان فى موبايلى..والنعمة لافضحة..انا هربيه..وفعلا سجلتها وبعتها لاصحابه اللى فى الشغل كلهم واحتفلوا بيه اول ما دخل  الشغل بسيمفونية الشخير بتاعته..تقولوش بيتهوفن..بس احسن هوا لسه شاف حاجة